Annað útrásarverkefni

Er í vinnslu og verður lokið við það á morgun.  Er búinn að vera að fara í gegnum málið í dag og hjólsögin verður sett í málið og það klárað.  Er hætt við að sumum bregði í brún, þegar á þarf að hlusta.  Þar með lýkur formlega áratugalöngum kafla í mínu lífi, sem ég hefði átt að vera búinn að afgreiða fyrir löngu, og sá dráttur sem orðið hefur á er búinn að kosta mig tíma, peninga og hugarástand sem ég hef enga þörf fyrir, og hefur eyðilagt meira fyrir mér en margt annað sem ég hef gengið í gegnum.

Sáttur og framtíðin er ekki lengur það sem hún virtist fyrir ekki svo löngu síðan

Útrásin er byrjuð.

Jæja loks kom að því eftir nokkuð langt hlé að ég fékk almennilega útrás.  Eins og ég hef áður sagt hér þjáist ég af meðvirkni, meðaumkun, og öllu með- sem til er held ég bara hreint.  Hins vegar þegar ég fæ nóg, þá fæ ég mikið meira en nóg, og þá er bara fokið í öll skjól, ekki flest.  Eitt slíkt atvik átti sér stað í dag þegar aðili sem ég er búinn að hliðra til fyrir, og aðstoða á mikið meira en allan hátt, fór yfir strikið.  Eins og "allur" bærinn hefur sjálfsagt getað heyrt þrátt fyrir veðrið er ekki gott að verða fyrir því að kveikja á mér.  Viðkomandi aðila var gjörsamlega spólað upp og út- ekki með hornaboltakylfu neitt, heldur notaðist ég við hjólsög til að vera nú nógu fljótur að gera það sem þurfti áður en ég skipti um skoðun og dytti í meðvirknispakkann á ný.  Þetta er ægileg staða að vera í og að ég skuli setja mig í hana sjálfur aftur og aftur er algerlega fáránlegt. 

Aðalatriðið er að ég er sáttur við niðurstöðu málsins.

Útrásin mun halda áfram, hreinsað verður vel til í með-pakkanum og sama hvað skeður þá verður ekki aftur snúið í gamla farið EVER! 

 

Lofaður!

Langt síðan ég velti þessu orði fyrir mér.  Kitlar nú samt hjartaskömmina að geta sagt að maður sé lofaður.  Manni hlýnar einhvern veginn öllum og breytist, samt ekkert í rúsínu eða rassgat neitt eins og mér er tjáð að gerist oft norðanlands, af ábyrgðarfullum einusinnivar AKureyringum. 

Verð nú samt að hætta að brjóta niður aðra hverja konu á landinu, með þessum leik- orðaleik.

Hitt er svo annað mál að nú fer hver að verða síðust í þeim málum, því veiðileyfaútgáfu á mig verður hætt þann 1. febrúar, og hefst ekki aftur fyrr en eftir 16. mars en þá verður yngsta dóttirin fermd.  Hafið hugfast að ekki er víst að ég verði til staðar á þeim tíma, allt eins gæti verið að mig mætti finna allt annars staðar í veröldinni en eins og með svo margt annað: Spyrjið!, og ef mér líst þannig á gæti verið að svarið yrði rétt.

Eins og sjá má er sjálfið mitt gjörsamlega í molum þessa stundina, get ekki ímyndað mér hvernig verður að fara einn til sólarlanda fjær í vestri, með íslenskri ferðaskrifstofu sem kennir sig við heiminn.    

Straumur heimsótti mig í dag, orsök þess er að ég er burðarás í mínu verkefni og tröppuskratti óstöðugur sem ég stóð í fór eitthvað að sveiflast til og ég greip í það er hendi var næst - rafmagnskapal.  Höndin seig svo niður eftir kaplinum uns endanum var náð og straumurinn seytlaði um æðarnar- aldeilis frábær upplifun!

Verbúð - sambúð - vosbúð.

 

Verbúð er eitt fallegasta orð sem ég hef séð a prenti undanfarna mánuði  

Sambúð er hlutur sem ég læt ekki hafa mig út í á næstunni  

Vosbúð kemur oft á eftir sambúð og er langversta búðin

Nú svo opnar maður bara nýja búð  

Örvæntingarstjórnmál

Alveg hjartanlega sammála Steingrími.  Eina spurningin er sú af hverju hann beitir þessu þá ekki í eigin flokki?  „Þetta er í mínum huga ekki til marks um neitt annað en einhverja hyldýpis-örvæntingu sem er eiginlega erfitt að skilja, af hverju menn geta ekki bara jafnað sig og sleikt sárin í minnihluta og tekið því eins og menn.“  Eða er flokkur hans kannski samansafn af hópum, eða jafnvel einstaklingum sem hann ræður ekkert við?  Andskotans vesen er á þessu liði þínu Steingrímur!  Klúðruðu hverjum meirihlutaviðræðunum á fætur öðrum síðastliðið vor  tóku svo við Kórónajakkafataprinsinum sem gengur ekki í nærbuxum einu sinni skv. reikningum, í haust, og húka nú beygð og brotin undir ráðhúsveggnum eftir hundrað daga æðislegt traust og samheldið meirihlutasamband.

 

 

Stjórnarskiptin til marks um örvæntingu

Glæsilegri kvenkostir fást ekki

Var að rifja upp í kvöld frétt frá því í síðustu viku um hvernig leikarar í USA héldu aftur af drengjum sem sóttust eftir dætrum þeirra.  Þetta kom upp í hugann þegar dætur mínar tvær voru inni í stofu og ég var með þá þriðju í símanum að þylja upp einkunnir sínar.  Þá fjórðu er ég búinn að missa út úr höndunum í fangið á Hafnfirðingi, en hann má þó eiga það að hann er þokkalegasta eintak af slíkum að vera, og hún Sóley Birta sem hann á aðild að er alveg gjörsamlega úrvalsupphaf að afaseríu minni sem ég er nú farinn að huga að.  Hvað hinar varðar er staðan þannig að ég á ýmis tromp á hendi sem ég get beitt ef mér finnst brýn þörf á.  Annars er bara svo mikið vit í kollinum á þeim(hvaðan ætli það sé), að engin ástæða er fyrir mig að efast neitt sértaklega um þeirra val, og engri þeirra myndi ég vilja breyta á nokkurn hinn minnsta hátt-þá meina ég ENGAN.  Ekki ætla ég að fara að setja út á að mamma þeirra sé ekki búin kenna þeim á þvottavél, eða benda þeim á að fötin detti ekki úr henni straujuð inn í skáp, og það sé betra að hafa vatn á straujárninu og kveikt á eldavélinni.

Hitt er svo aftur annað mál að ÉG kann á þvottavél, uppþvottavél, saumavél, og meira að segja hakkavél, og get notað þær.(bara svona smá ónauðsynlegar upplýsingar fyrir þá er kynnu að vera að velta því fyrir sér)

Desperado.

Táknrænt lag fyrir líf þeirra sem ÁTTA sig ekki á að maður á ekki að SÆTTA sig við neitt, allra síst ef maður hefur tækifæri til að sækjast eftir því sem mann langar til.  Af hverju að sætta sig við tvíböku alltaf ef mann langar í rjómabollu?  Og til hvers í fjandanum að draga alltaf tíguldrottninguna þegar hjartadrottningin er málið.

Get alveg öskrað þegar ég horfi upp á fíflaganginn í kringum mig stundum.

EYMD ER VALKOSTUR.

  

Meðvirkari en andskotinn!

Rann upp fyrir mér er ég var að sinna mínum málum í dag, að ég er algjörlega lost í þessu tiltölulega nýja orði í mínum orðaforða.   Á tímabili var ég með mínar hugmyndir um tilvist og iðjusemi guðs og af hve miklu fálæti mér fannst komið fram við mig af viðkomandi oft á tíðum- væri hann til, og hlutirnir gengju nú ekki fyrir sig eins og ég vildi eða taldi best!

Samt, samt var ég tilbúinn að rétta honum hjálparhönd ef eftir var leitað og mér fannst ástæða til, og skipti þá ekki máli hvort kom á undan, beiðnin eða tilfinningin að aðstoðar væri þörf!  Hugsið ykkur!!!  Tilbúinn að gera hvað sem er fyrir einhvern sem ég stórefaði að væri jafnvel til!!!

Ég ætla nú ekki að fara út í smáatriði meðvirkni minnar en ég held að það sé ekki hægt að vera meðvirkari en þetta svei mér þá.

Varð svo hugsað til námskeiðs sem ég fór á í USA fyrir tveimur árum og að ég þyrfti nú að fara að dusta rykið af gögnum þaðan en námskeiðið hét: Nice people do say no 

Með landið í bandi.

Er búinn að vera að taka inn daginn, ekkert með teskeið neitt, heldur skóflu!, vill bara svo vel til að meltingarfærin eru i standi til að vinna úr hlutunum.  Það var magnað að flatmaga á ströndinni í nótt, og eftir daginn er maður orðinn svo bjartsýnn að það munar ekkert um að færa skerið aðeins til á lengdar og breiddargráðum til að komast þangað sem ég vil ná, og svei mér þá ef ég trúi því bara ekki að það sé hægt!!!

Svona er nú gaman stundum að vera til, og ekki skemmir fyrir þegar aðrir eru að benda manni á hvað maður sé að gera fína hluti. 

Aðalatriðið er að lifa í nútíðinni, eiga drauma um framtíðina, og muna fortíðina.

  

Í sólina suður

Hreinlega allir sem ég þekki eru að koma úr, eða eru að fara eitthvert í sól.  Að sjálfsögðu eru svona fullyrðingar aldrei réttar en það tekur mann nú ekkert allt of langan tíma að sannfærast um að þetta sé staðan þegar veðrið er svona eins og í dag.  Er búinn að vera að þræða göturnar á Kanaríeyjum í kvöld í huganum og svei mér þá ef mér hitnaði bara ekki um svona eins og fimm gráður á meðan og sólin- hún skein stanslaust allan tímann. 

Er að hugsa um að fara að kíkja á bæklinga ferðaskrifstofanna á netinu og leggjast svo í sólbað(rúmið), og vakna svo bara brúnn og sællegur í fyrramálið og taka þá stöðuna á ný, og sjá hvort ástæða er til að skoða einhverja möguleika nánar