Afrugluðum ráðamönnum farnast best!

Þetta ástand sem hefur skapast á fjármálamörkuðum á eftir að hafa gríðarleg áhrif í þjóðfélaginu á næstu misserum. 

Nú er svo komið að þetta er farið að hafa áhrif á alla landsmenn á einn eða annan hátt.  Vöruverð er tekið að hækka, lánin eru að hækka, kaupmátturinn að lækka, og sígur snarlega á næstunni, verði engar breytingar á því ferli sem er í gangi.

Hvað er til ráða?  Ekki er hægt að dreifa peningum eins og matarávísunum meðal fólks- eða hvað?

Ég er ekki viss um að það samrýmist þeim hagfræðikenningum sem Seðlabankinn fer eftir!

Og hverjar eru þær svo? 

Nú eru helstu seðlabankar heimsins að dæla út fréttum af því að þeir séu að tryggja bönkum aðgang að fjármagni á "bærilegum" kjörum til að halda atvinnulífinu og hagkerfum sínum gangandi.

Hér á Íslandi finnst mér aðaltrikkið vera í því að svíða aðeins á þeim rassgatið Sigurði Einarssyni, Jóni Ásgeiri og félögum,- og Davíð heldur á logsuðutækinu og stjórnar gasflæðinu.

Held það ætti nú bara að skipta út aðalleikurunum og kaupa nýja, áður en stöðutaka nokkurra manna setur okkur öll 50 ár aftur í tímann.

Á meðan þetta dynur yfir hefur viðskiptaráðherra mestar áhyggjur af því hvernig eitt fyrirtæki kaupir annað- þvílíkt bull!  Hvar á Exista frekar en almenningur að fá peninga til að kaupa Símann eða Skipti eða Mílu eða hvað þetta heitir nú, gamli Landssíminn?  Og af hverju ætti almenningur að eyða síðustu aurunum í hlutabréf sem eru á leiðinni beint til helvítis að því best verður séð.

Fjármálaráðherrann á fjöllum, Össur að skoða urriða, Ingibjörg í Afganistan, Gulli blóðugur upp að öxlum á Landspítalanum, og Þórunn brjáluð útí horni yfir þessum ólögum sem hún verður að fara eftir í álversmálum hvort sem henni líkar betur eða verr. 

Dómsmálaráðherrann í tindátaleik á suðurnesjum, búinn að sjá það út að með því að deila árangri Lögreglustjórans þar niður á fleiri embætti, stofnanir og eitthvað, þá verði meðaltalið heildarlega séð- betra!  Að vísu heyrist því fleygt að þetta sé eitthvert fléttuafbrigði hjá ráðherranum og raunverulega niðurstaðan komi í ljós síðar!

Samgönguráðherrann á námskeiði í búðarrekstri því hann er jú að taka við flugstöðinni- þvílík tímaskekkja, hvern andskotann er ríkið að reka snyrtivöruverslanir og nammibari?  Á meðan er allt stopp á Reykjanesbrautinni því þessir hundruðir sem starfa hjá vegagerðinni þurfa jú að vinna fyrir kaupinu sínu og það tekur nú tímana tvo og þrjá.

Og Geir og Þorgerður!, veit ekki á hvaða balli þau eru, eða hvað klukkan er hjá þeim.  Eitt er þó víst að bensínið er að verða búið og viðbúið að þau gangi heim.

Framsóknarflokkurinn í útrás á Kanaríeyjum- ég er ekki hissa á því að þeir eru þar á eyju sem er að syngja sitt síðasta, vitlaus timasetning eins og svo margt annað þar á bæ undanfarin ár.

Steingrímur: oh boy, oh boy, þarf að segja meira?  Aumingjans fólkið sem er fast þarna inni með honum.

Frjálslyndir eru svo frjálsir og óháðir eða í Íslandseinhverjum blús að þeir eru bara týndir.

Á meðan brennur Ísland!

Spurningin er - hve lengi enn og hvað verður eftir fyrir næstu kynslóðir að byggja upp ef ekkert verður gert?

Hér eru svo mínar tillögur- endurskoðaðar frá því í febrúar:

Seðlabankinn tryggi bönkunum aðgang að fjármagni í samráði við fjármálaráðuneytið- ekki í neinum smáskömmtum heldur nóg til að kveða niður allar efasemdaraddir erlendis frá. 

Ríkið haldi sig á mottunni framkvæmdalega, og vaði ekki áfram í einhverju óðagoti.  Vinni skipulega að markmiðum sínum.  Á auðveldlega að geta haldið úti verkefnaskrá í vegagerð t.d. næstu árin.

Ríkið greiði götu þeirra fyrirtækja sem hingað vilja koma, og raði þeim í tímaröð á negldum samningum- það er ekki að verða neitt sérstakt að vera ekki að keyra með kolum eða olíu.

Stuðningur ríkisins við sveitarfélögin á landsbyggðinni séu af einhverju viti, ekki eins og t.d. andvirði þessarar einu Toyota Corolla bifreiðar sem Sandgerði fékk vegna aflaskerðingar, eða einu sinni í bíó fyrir alla- án afsláttar.  

Hækka laun þingmanna í tvær milljónir á mánuði, svo við fáum eitthvað almennilegt fólk til að gefa sig í þetta, og sem er hæft til að taka þátt í að halda uppbyggingu landsins áfram.   

 

 

Athugasemdir

[Jónína Dúadóttir, 22.3.2008 kl. 14:03]

Heyrðu, ég kýs þig !

[Birna Dúadóttir, 22.3.2008 kl. 15:32]

Bjössa á þing,ekki spurning

[Ingvar, 22.3.2008 kl. 17:55]

Bjössa á þing segið þið ?  

Ég er bara smeykur um að hann sé að glata trúnni og sé farinn að snúast í einhverja bölvaða vinstri sveiflu.

Annars bráðskemmtileg lesning.

[Björn Finnbogason, 22.3.2008 kl. 23:48]

Vegna fjölda áskorana...., fjölmargir hafa haft samband...., kann þetta svo sem allt- en kann betur við mig í Grófinni!

Ég kýs Sjálfstæðisflokkinn til dauðadags vegna þess sem hann stendur fyrir, ekki vegna þess hverjir eru í forsvari fyrir hann- Það hefur verið og verður misjafnlega að mínu skapi- fólk Þingflokkurinn hefur t.d. oft verið öflugri, heilli, og reynslumeiri

[Birna Dúadóttir, 23.3.2008 kl. 01:11]

Töffari