Nú hefst niðurtúrinn fyrir alvöru!

Þá er sá tími kominn að velferðarstjórnin hefur göngu sína -loksins!  Hræddur er ég um að mörgum eigi eftir að bregða í brún er líða fer á sumarið og það kemur virkilega í ljós hve ástand landsins fjárhagslega er slæmt.  Enn eitt áfallið dynur á okkur svona í ágúst þegar Ríkissjóður getur ekki greitt út vaxtabæturnar og svo hefst lækkun bótagreiðslna og í framhaldi af því uppnám í annarri hverri fjölskyldu landsins.

Þetta greiðsluaðlögunarferli sem boðið er upp á er varhugavert fyrir allra hluta sakir, mér finnst að folk eigi að ígrunda það vel hvort það ætlar að taka á sig byrðar bankanna.  Sennilega er oftar auðveldara fyrir fólk hreinlega að byrja upp á nýtt og halda sínu sjálfsaflafé hvað sem það svo er, frekar en að vera með lögmann og dómara til að ákveða hvort það fær sér hamborgara eður ei.

Í einstaka tilfellum getur þetta virkað en þau eru sennilega sjaldgæf.  Ég þekki fólk sem hefur í fleiri ár verið að reyna að forðast gjaldþrot -með óafturkræfum áhrifum á heimilislífið, sálarlífið, lífsstílinn og lífsmynstrið.

Má ég þá frekar biðja um að verða gjaldþrota og byrja hreinlega upp á nýtt.

Megi sem flestir lifa þessar hamfarir af! -Í bókstaflegum skilningi!