Ekki tími fyrir Davíð að sigra.

Nú er ljóst að til þess að einhver friður geti orðið um aðgerðir í kjölfar hrunsins hér á landi verða allir þeir að víkja sem umdeilanlegir eru.  Skiptir þá engu hvort þeir eru sekir eða saklausir.  Nú er heldur enginn tími fyrir stolt eða eftirmæli.  Það eru ekki til falleg lík!

Davíð Oddson verður að segja upp starfi sínu, annars verður að reka hann.  Sama á við um aðra seðlabankastjóra.

Stjórn Seðlabankans verður að segja af sér.

Stjórn Fjármálaeftirlitsins verður að segja af sér.

Það verður að víkja öllum núverandi stjórnendum bankanna sem voru þar áður.

Það þarf að tryggja að bankarnir gæti jafnræðis gagnvart viðskiptavinum sínum og ekki sé verið að afskrifa hundruði milljóna af fáum, en hengja svo restina.

Tryggja hámarksafrakstur af sölu eigna gömlu bankanna.

Heimila gjaldfellingu lána og yfirtöku bankanna á sjávarútvegsfyrirtækjum ef þau skila ekki gjaldeyristekjum heim.

Við erum að fara inn í enn dýpri dal en við erum í núna.  Það minnsta sem stjórnmálamenn geta gert er að hreinsa svo út úr þessum fjármálageira að almenningur geti að minnsta kosti lifað við þá sem þar eru.

Síðar kemur tími til að smúla út af alþingi.  Við höfum hreinlega ekki tíma í það núna en með hækkandi sól finnst mér að sjálfsagt sé að efna til kosninga.